پیش کرتا ہوں میں اُس مینا کماری کو خراج

بہ یادِ ممتاز فلمی اداکارہ مینا کماری
تاریخ تولد : یکم اگست ۱۹۳۲
تاریخ وفات ۳۱ مارچ ۱۹۷۲

احمد علی برقیؔ اعظمی

پیش کرتا ہوں میں اُس مینا کماری کو خراج
جو دلوں پر کرتی تھی اپنی اداکاری سے راج
مہ جبیں بانو سے جو مینا کماری بن گئی
دل بری اور دل نوازی کا تھا اس میں امتزاج
سن بہتّر میں جو اس دنیا سے رخصت ہو گئی
حکمراں ہے وہ دلوں پر آج بھی بے تخت و تاج
فلمی دنیا میں ہے جس کا شہرۂ آفاق نام
رہتی دنیا تک کریں گے پیش سب اس کو خراج
مِٹ نہیں سکتے کبھی اُس کے نقوشِ جاوداں
جیسے تھے مقبول کل وہ، ویسے ہیں مقبول آج
اُس اداکارہ کا سب سے منفرد انداز تھا
غم زدہ انسانیت کی تھی صداے احتجاج
تھی اداکارہ وہ جیسی ویسی ہی تھی شاعرہ
غم کی اک ملکہ تھی، جس کا دردِ دل تھا لا علاج
’’جوار بھاٹا‘‘ اور ’’پاکیزہ‘‘ میں اپنے کام سے
کردیا پیدا دلوں میں اہل دل کے اختلاج
پردۂ سیمیں پہ تھیں جس کی ادائیں دل نواز
فلم بینوں کی تھی برقیؔ اعظمی وہ ہم مزاج
***
برقی اعظمی کی گذشتہ تخلیق :حامد امروہوی تھے وہ انسان