آنا ملک بنگالہ سے درویش صفت طیب فرقانی کا شہر پورنیہ میں اور قدم رنجہ فرمانا فقیر کے جھونپڑے میں
۔۔۔۔۔۔۔۔۔۔۔۔۔۔۔۔۔۔

احسان قاسمی

درویش صفت جوان اور
ishtiraak.com
کے روح رواں جناب طیب فرقانی آج صبح ساڑھے دس بجے کانکی ( مغربی بنگال ) سے ہمارے غریب خانے پر تشریف فرما ہوئے ۔
ان کے اعزاز میں ایک مختصر شعری نشست کا انعقاد کیا گیا ۔
نشست کی صدارت ڈاکٹر احمد حسن دانش صاحب نے فرمائی اور نظامت کی ذمہ داری احقر کے سر رہی ۔
خانوادہ قاضی نجم ہری پوری اور جلال ہری پوری کے چشم و چراغ رضوان ندوی نے نشست کے آخر میں خوب صورت الفاظ میں تمام حاضرین محفل کا شکریہ ادا کیا ۔
جناب طیب فرقانی نے قلبی مسرت کا اظہار کرتے ہوئے تمام احباب سے اشتراک ڈاٹ کام کو کامیابی سے ہم کنار کرنے کی اپیل کی ۔
پروفیسر اصغر راز فاطمی نے جناب طیب فرقانی کی خدمت میں اپنا مجموعہء کلام ‘ وا نہیں ہے کوئی در ‘ پیش کیا ۔
شرکائے محفل
۔۔۔۔۔۔۔۔۔۔۔۔۔۔۔۔۔
شاداب وفا پورنوی
زمانے سے الگ پہچان اپنی سرخ رو کر لوں
ادب سے چوم لوں ، دل میں بسا لوں ، روبرو کر لوں

سرِ محفل تو مجھ سے مل سناؤں حالِ دل اپنا
مری اردو غزل میں ڈھل کے تجھ سے گفتگو کر لوں
۔۔۔۔۔۔۔۔۔۔۔۔۔۔۔۔۔۔
شوق پورنوی
ہر اک سے نبھا لیتا ہے پیار سے رشتہ
دل میرا بھی کتنا ہے اداکار زبردست

جھک کے چلنا تو شریعت کا تقاضہ ہے مگر
اتنا بھی ٹھیک نہیں جس سے کہ معیار گرے
۔۔۔۔۔۔۔۔۔۔۔۔۔۔۔۔۔۔
رضوان ندوی
اک مومنِ کامل کی دعاؤں کا اثر ہے
اس بندہء ناچیز کے دامن میں گہر ہے

قدرت کا کرشمہ ہے کہ زندہ ہوں ابھی تک
دشمن تو مٹانے پہ تلا شام و سحر ہے
۔۔۔۔۔۔۔۔۔۔۔۔۔۔۔۔۔۔
احسان قاسمی
گزرا ہوا شباب ہوں اب تم سے کیا کہوں
اردو کی اک کتاب ہوں اب تم سے کیا کہوں

مالی نے جس کو موردِ الزام کر دیا
میں ہی تو وہ گلاب ہوں اب تم سے کیا کہوں
۔۔۔۔۔۔۔۔۔۔۔۔۔۔۔۔۔۔
اصغر راز فاطمی
جھوٹ ہے جو کچھ کہا ، جھوٹ ہے جو کچھ سنا
ایک بس سچی کتھا ، تیری کتھا میری کتھا

ماند ہوگی نہ کبھی رونقِ راہِ منزل
اک سفر سوئے گا تو ایک سفر جاگے گا
۔۔۔۔۔۔۔۔۔۔۔۔۔۔۔۔۔۔
ڈاکٹر احمد حسن دانش
غزل آنِ شاعری ہے ، غزل شانِ شاعری ہے
جو سچ پوچھئے تو دانش غزل جانِ شاعری ہے