Ehsan Quasmi .
( Md . Ehsanul Islam )
Rtd . Branch Manager ,
Uttar Bihar Gramin Bank
DOB – 18 Jan 1955 ( certificate )
Noori Nagar . PURNEA
Poet , Short Story Writer , Explorer of ‘ Seemanchal Adab Ka Gahwara ‘
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تعارف
۔۔۔۔۔۔۔۔۔۔
نام – محمد احسان الاسلام
قلمی نام – احسان قاسمی
تاریخِ پیدائش – ۲۲ فروری ۱۹۵۴ ء ( بقول بڑی آپا )
سرٹیفیکیٹ – ۱۸ جنوری ۱۹۵۵ ء
جائے پیدائش – پورنیہ
والد – ابوالقاسم مرحوم ( اسسٹنٹ انجینئر ، ڈسٹرکٹ بورڈ پورنیہ ) ولد محمد علی مرحوم
والدہ – فاطمہ خاتون مرحومہ ( بنت اظہار علی سرکار مرحوم ۔ لہوج گرام ، نزد شہر رائے گنج ۔ ضلع : اتر دیناج پور ۔ بنگال )
آبائ گاؤں : متھورا پور ۔ تھانہ : آباد پور ۔
وایا : بارسوئ ۔ ضلع : کٹیہار
مستقل پتہ – نوری نگر ۔ خزانچی ہاٹ ۔ پورنیہ
۔۔۔۔۔۔۔۔۔۔۔۔۔۔۔۔۔۔۔
اثاثے Assets
۔۔۔۔۔۔۔۔۔۔۔۔۔۔۔۔۔۔
شریکِ حیات – ماہِ منیر اسلام ( بنت سید ابو ظفر مرحوم ، پرنسپل )
اثمارِ حیات – دو بیٹیاں
عروج اسلام ( بی ٹیک )
عظمیٰ اسلام ( بی ایس سی ، کلینیکل نیوٹریشن اینڈ ڈائٹیٹکس )
داماد – عبدالمنتقم نجمی ( انجینئر )
نواسہ – اذہان نجمی
۔۔۔۔۔۔۔۔۔۔۔۔۔۔۔۔۔۔۔
دینداری Liabilities
۔۔۔۔۔۔۔۔۔۔۔۔۔۔۔۔۔۔
کچھ ذاتی اور کچھ سیمانچل کا قرض / چھوٹی بیٹی کی تعلیم اور شادی / حج
۔۔۔۔۔۔۔۔۔۔۔۔۔۔۔۔۔
تعلیم
۔۔۔۔۔۔۔۔
ابتدائ ۔ خزانچی ہاٹ اردو مڈل اسکول ، پورنیہ
ثانوی ۔ ضلع اسکول ، پورنیہ
گریجویشن – بی اے ( آنرز ) معاشیات پورنیہ کالج ، پورنیہ ۔
۔۔۔۔۔۔۔
پیشہ
۔۔۔۔۔۔۔
برانچ مینیجر ۔ اُتّر بِہار گرامین بینک ۔
ملازمت سے سبکدوشی کی تاریخ – ۱ ۳ جنوری ۲۰۱۵ ء
۔۔۔۔۔۔۔۔
مشغلہ
۔۔۔۔۔۔۔۔
شاعری ، افسانہ نگاری ، مضمون نگاری ۔
۔
افسانہ نگاری و شاعری کی ابتدا – ۱۹۷۶ ء
تحریک – استاد محترم پروفیسر طارق جمیلی مرحوم / پورنیہ اردو سوسائٹی ، پورنیہ
استاد – باقاعدہ استاد کوئی نہیں
صنفِ سخن جن میں طبع آزمائی کی – نظم ، غزل
۔۔۔۔۔۔۔۔۔۔۔
اشاعت
۔۔۔۔۔۔۔۔۔۔۔
شاعری کی اشاعت پر کبھی توجہ نہیں دی ۔ اردو / ہندی کے چند اخبارات و رسائل میں نظموں اور غزلوں کی اشاعت ۔
۔۔۔۔۔۔۔۔۔۔۔۔۔۔۔۔
ادبی خدمات
۔۔۔۔۔۔۔۔۔۔۔۔۔۔۔
شعری مجموعہ
۔۔۔۔۔۔۔۔۔۔۔
” دشتِ جنوں طلب ” سال اشاعت ۲۰۲۰ ء
۔۔۔۔۔۔۔۔۔۔۔
افسانوی مجموعہ
۔۔۔۔۔۔۔۔۔۔۔
‘ پیپرویٹ ‘ ۔ سال اشاعت ۲۰۱۷ ء
( ہند و پاک کے مقتدر ادبی رسائل میں افسانوں کی اشاعت )
۔۔۔۔۔۔۔۔۔۔۔۔۔۔
ادبی رسالہ
۔۔۔۔۔۔۔۔۔۔۔۔۔۔
سہ ماہی ادبی رسالہ ‘ عکس ‘ کی ۲۰۰۶ ء میں ارریہ سے اشاعت ۔ ( ایک شمارہ )
۔۔۔۔۔۔۔۔۔۔۔۔۔۔
تحقیقی کام
۔۔۔۔۔۔۔۔۔۔۔
‘ سیمانچل ادب کا گہوارہ ‘
( سیمانچل کے ادباء و شعراء پر تحقیقی کام جس کا سلسلہ فی الحال فیس بک پر جاری ہے ،
کتابی شکل میں اشاعت کا ارادہ ہے ۔ اس کی پہلی کڑی ” سیمانچل کے افسانہ نگار ” کتابی شکل میں ان شاء اللہ جلد ہی اشاعت کے مراحل طے کرنے والی ہے ۔)
۔۔۔۔۔۔۔۔۔۔۔۔۔۔۔۔۔۔۔۔۔
نمونہء کلام
۔۔۔۔۔۔۔۔۔۔۔۔۔۔۔۔۔۔۔۔۔
شعری مجموعہ ‘ دشتِ جنوں طلب ‘ سے
۔۔۔۔۔۔۔۔۔۔۔۔۔۔۔۔۔۔۔۔۔
حمد
۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔
گھٹاؤں میں
فضاؤں میں
خلاؤں میں
دِشاؤں میں
کسی کا حسن بکھرا ہے
گلابوں میں
کتابوں میں
نداؤں میں
دعاؤں میں
کسی کا نام لکھا ہے
اُسی کو ڈھونڈتا ہوں میں
اُسی کی چاہ میں گُم ہوں
وہی مقصود ہے میرا
وہی مطلوب ہے میرا
وہی محبوب ہے میرا
جو میری دھڑکنوں میں ہے
وہ ربّ العامیں میرا ۔۔۔۔۔۔ !!
۔۔۔۔۔۔۔۔۔۔۔۔۔۔۔۔۔۔۔
اندھا سفر ، اداس ہوا ، تیرگی تمام
دستِ جنوں سمیٹ چکے تشنگی تمام
سڑکوں کے قمقمے بھی مقدر سے لڑ چکے
مصلوب ہو چکا ہے شہر ، روشنی تمام
پتھر دکھا رہا ہے تو آئینہ ساز کو
اپنا بدن بھی دیکھ کہ شیشہ گری تمام
صحرا نشیں کی بات نہ اچھی لگی انہیں
اپنے گھروں کو لَوٹ گئے آدمی تمام
میں تو تمہاری ذات کے سانچے میں ڈھل گیا
مجھ کو پکارتی تھی ہوا سرپھری تمام
دشتِ جنوں طلب سے گزرے ہیں بارہا
شعلہ فشاں بنی ہے مری شاعری تمام
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جانے کیسی آگ لگی مدھ شالا میں
مدھ بالا مدہوش ہوئ مدھ شالا میں
دن بھر جوگی آس لگائے بیٹھے تھے
رانی جو تھی رات کھِلی مدھ شالا میں
جانے کیسے لوگ وہاں کل آئے تھے
ایسی ویسی بات چھڑی مدھ شالا میں
مے کش سارے روز وظیفہ پائیں گے
یہ کیسی افواہ اڑی مدھ شالا میں
ساقی نے بھر پور پلایا نینوں سے
جب جب میری آنکھ جگی مدھ شالا میں
مذہب، جاتی ، نسل ، سیاست جو بھی تھا
سب بھولے ، بس خوب چلی مدھ شالا میں
ملّا پنڈت دست گریباں ہو بیٹھے
ہندو مسلم خوب مچی مدھ شالا میں
پینے پر جب شرط لگائ ساقی نے
بڑھتے بڑھتے بات بڑھی مدھ شالا میں
ہم اپنے غم بھول چلے تھے جب یارو
جانے کب اک شمع جلی مدھ شالا میں
احساں بھائ ! بھور بھئ ، گھر جاؤ نا
دھیرے دھیرے رات ڈھلی مدھ شالا میں
جیون بھی احسان میاں مدھ شالا ہے
اپنی ساری عمر کٹی مدھ شالا میں
۔۔۔۔۔۔۔۔۔۔۔۔۔۔۔۔۔۔۔۔۔۔
کیا حال ہے اس دل کا اُس کو یہ بتانا ہے
وہ لاکھ کرے نانا ، گھر بھی تو بسانا ہے
مزدور کے جیون میں بس ایک ہی ہے موسم
ہر روز نکلنا ہے ، ہر روز کمانا ہے
اسٹیج ہے دنیا تو اسٹیج کا پردہ بھی
ہر بار اٹھانا ہے ، ہر بار گرانا ہے
میں روز ملا اس سے لیکن ہے وہی قصہ
ہر روز کہانی ہے ، ہر روز فسانہ ہے
تم دھوپ سمجھتے ہو میں وقت گراں مایہ
ہر صبح نکلنا ہے ، ہر شام کو جانا ہے
کیوں چونک اٹھے جاناں وہ شخص نہیں آیا
کچھ تیز ہوائیں ہیں ، دروازہ پرانا ہے
ماں باپ کی چاہت کا مخصوص ہوا اک دن
اک رسمِ شناسائی ہر سال نبھانا ہے
وہ عقل تماشہ گر ، یہ عشق تماشائی
دونوں کی رفاقت کا انداز پرانا ہے
وہ دور گیا یارو ہر شخص شناسا تھا
تم لاکھ کہو کچھ بھی یہ اور زمانہ ہے
احسان میاں سن لو برباد ہوئے ہو تم
جو روگ لگایا ہے ، وہ روگ بہانہ ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔
زیر ترتیب شعری مجموعہ ‘ وادئ غزل میں قیام ‘ سے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تمھارے شہر کو انتِم سلام کر لیں گے
جُنوں کی شام ہے خود سے کلام کر لیں گے
۔
بُلا ئیں خواہ مضامینِ نو ، فسانے پر
غزل کی وادیو تجھ میں قیام کر لیں گے
۔
غزل جو روز لِکھِیں ہم نے لاک ڈاؤن میں
غزل وہ بھیج رسالوں میں نام کر لیں گے
۔
مرے ہی نام کا کانٹا اگر کھٹکتا ہے
تو اُس کے واسطے خود کو انام کر لیں گے
۔
بلا سے آج تمھارا ہی زور چلتا ہو
تمھارے سامنے حاصل مقام کر لیں گے
۔
زباں کے دوش پہ قومیں عروج پاتی ہیں
زباں کو چھوڑ دیا تو غلام کر لیں گے
۔
تمھارے ذہن پہ مسلک سوار رہتا ہے
کسی فقیر کو اپنا امام کر لیں گے
۔
لگا ہے زنگ تو آلاتِ حرب پر لیکن
پڑے گا وقت اگر بے نیام کر لیں گے
۔
ہمارے طفل بھی اب سر بکف ہوئے گویا
روِش جو خاص تھی اس کو یہ عام کر لیں گے
۔
کہا ہے ماں کی تسلی کو فون پر احساں
کسی بھی یار کے گھر پر طعام کر لیں گے
۔۔۔۔۔۔۔۔۔۔۔۔۔۔۔۔۔۔۔
گزرا ہوا شباب ہوں اب تم سے کیا کہوں
اردو کی اک کتاب ہوں اب تم سے کیا کہوں
۔
مالی نے جس کو مورد ِ الزام کر دیا
میں ہی تو وہ گلاب ہوں اب تم سے کیا کہوں
۔
سب کچھ لٹا کے خود ہی گنہگار ہو چلا
بگڑا ہوا ثواب ہوں اب تم سے کیا کہوں
۔
میرے سُروں میں بات وہ آئے بھی کس طرح
ٹوٹا ہوا رباب ہوں اب تم سے کیا کہوں
۔
اندر ہے ریت ریت ،چمک ، دھوپ ، تشنگی
جیسے کوئی سراب ہوں اب تم سے کیا کہوں
۔
آدھا بنا کہ ذہن سے یکسر نکل گیا
بھولا ہوا حساب ہوں اب تم سے کیا کہوں
۔
جو ممتحن نے کاٹ دیا ، زیرو دے دیا
شاید وہی جواب ہوں اب تم سے کیا کہوں
۔
جس کو زمین و آسماں دونوں سے بھے لگے
بھوگا ہوا عذاب ہوں اب تم سے کیا کہوں
۔
تم دو قدم بھی ساتھ مرے چل سکو اگر
بھیگی ہوئی جراب ہوں اب تم سے کیا کہوں
۔
خوشبو ہماری دور تلک جائے اُس گلی
جلتا ہوا کباب ہوں اب تم سے کیا کہوں
۔
احساں ہماری بات ہی اب تم سے کیا رہے
بے شک بہت خراب ہوں اب تم سے کیا کہوں
