محسن نوازمحسن دیناج پوری: ایک ادب نواز شخصیت

مرتب: محمد احسان االاسلام (احسان قاسمی)

MOHSIN NAWAZ MOHSIN DINAJPURI
Poet & Editor
D O B :- 16 AUG 1992
P / Add – Quazi Gaon
PO – Amal Jhaari .
PS – Islampur . Dist – U/ Dinajpur
BENGAL
۔۔۔۔۔۔۔۔۔۔۔۔۔۔۔۔۔۔۔۔۔
تعارف

اصل نام – محسن نواز
والد – اطیع حسین مرحوم
والدہ – خدیجہ بیگم
تاریخِ پیدائش – ۱۶ اگست ۱۹۹۲ ء
آبائی گاؤں – قاضی گاؤں ۔
پوسٹ – عمل جھاڑی ۔ تھانہ : اسلام پور
ضلع – اتر دیناجپور ( بنگال )
شریکِ حیات – زیرِ تلاش
۔۔۔۔۔۔۔۔۔۔۔۔۔
تعلیم

ابتدائی – گاؤں کے ‘ مدرسہ نورالایمان ، عمل جھاڑی ‘ سے
۲۰۰۵ ء میں تایا زاد مولانا عبدالمبین نوری کے ہمراہ حصولِ تعلیم کے سلسلے میں حیدر آباد کا سفر ۔
عالم و فاضل ( عربی ) جامعہ نظامیہ ، حیدر آباد سے ۔
عالم ، فاضل ، کامل ( اردو بورڈ ) ادارہء ادبیات ، حیدرآباد
بی اے – مولانا آزاد اردو یونیورسٹی ، حیدر آباد
۔۔۔۔۔۔۔۔۔۔۔۔۔۔
پیشہ: کاشت کاری و تجارت

رابطہ: 9100917803
۔۔۔۔۔۔۔۔۔۔۔۔۔۔
شاعری کی ابتدا – ۲۰۰۹ ء سے
تلمذ – مفتی ذاکر حسین نوری فناءالقادری ، سردار سلیم حیدر آبادی
۔۔۔۔۔۔۔۔۔۔۔۔۔۔
اشاعت: کنزالایمان دلی ، ماہِ نور دلی ، خاتونِ مشرق دلی ، اصنام شکن وشاکھاپتنم ، جرائم دہلی ، نوائے بنگال اور وجدان اتر دیناجپور ۔
اعتماد ، منصف ، رہنمائے دکن ، اخبارِ مشرق ، قومی تنظیم ، انقلاب وغیرہ
۔۔۔۔۔۔۔۔۔۔۔۔۔۔
شعری مجموعہ – زیرِ ترتیب
۔۔۔۔۔۔۔۔۔۔۔۔۔۔
دیگر ادبی مصروفیات: بانی : مولانا نورالدین اکیڈمی ، امل جھاڑی ( اتر دیناجپور ) ۲۰۱۳ ء
مذکورہ اکیڈمی کے زیر اہتمام ‘ نوائے بنگال ‘ مجلہ کی ۲۰۱۶ ء میں اشاعت ۔
مجلہ نوائے بنگال کے ایڈیٹر بھی رہے ۔
ششماہی ادبی رسالہ ‘ وجدان ‘ گُنجَریا ( اتر دیناجپور ) کے نائب مدیر رہے ۔ ۲۰۱۲ ء سے وجدان کے پانچ شمارے شائع ہوئے ۔
۔۔۔۔۔۔۔۔۔۔۔
کتب زیرِ قلم: امام اور موذن کا مرتبہ
سیمانچل کے اہلِ قلم
۔۔۔۔۔۔ ۔۔۔۔۔۔۔۔ ۔۔۔۔۔۔ ۔۔۔۔۔۔
نمونہ ء کلام
۔۔۔۔۔۔۔۔۔۔۔۔۔۔۔۔۔
حمد

جب قلم جھک کے تیرا نام لکھا کرتا ہے
گویا قرطاس پہ سجدہ یہ ادا کرتا ہے
مجھ سے کیا ہوگا ادا حمدِ الٰہی کا حق
سارا عالم تو میرے رب کی ثنا کرتا ہے
روح پاتی ہے غذا تیری ثنا سے یارب
یاد کرکے تجھے دل اپنی دوا کرتا ہے
کامیابی فقط اس کو ہی ملا کرتی ہے
مشکلوں میں جو تیرا نام لیا کرتا ہے
باغِ فردوس بھی مشتاق ہے اس بندے کا
تیرے فرمان پہ جو بندہ چلا کرتا ہے
کتنی بےمثل ہے یہ شانِ کریمی تیری
میں گنہ گار ہوں لیکن تو عطا کرتا ہے
کردے محسن کو عطا زورِ قلم تو یارب
حسنِ قرطاس یہی تجھ سے دعا کرتا ہے
۔۔۔۔۔۔۔۔۔۔۔۔۔۔۔۔۔۔
نعت

نام سے آپ کے جڑے الفاظ
معتبر ہو گئے مرے الفاظ
عاشقانِ نبی صلی کریں محسوس
مہکے مہکے ہیں نعت کے الفاظ
حق ادا کس طرح ہو مدحت کا
وہ کہاں اور کہاں مرے الفاظ
مشک و عنبر سے کر وضو اے قلم
ڈھونڈ کر لاؤں پھر نئے الفاظ
ان کی نسبت جو مل گئی مجھ کو
بن گئے چھوٹے سے بڑے الفاظ
شوق میں نعت لکھنے بیٹھا ہوں
جھوم کر عشق میں کھِلے الفاظ
مانگ کر نور سبز گنبد سے
نور میں نور ہو گئے الفاظ
سبز گنبد کا مل گیا صدقہ
ہو گئے ہیں ہرے بھرے الفاظ
نعت میں لاتے ہی سرِ قرطاس
پنکھڑی کی طرح کھِلے الفاظ
تم سے محسن یہی گزارش ہے
نعت میں لاؤ جاگتے الفاظ
۔۔۔۔۔۔۔۔۔۔۔
نعتیہ سلام دربارگاہ خیرالانام ﷺ

خدا کے محبوب دیں کے رہبر درود ان پر سلام ان پر
وہی ہیں بیشک شفیع محشر درود ان پر سلام ان پر

سخاوتوں کے وہ ہیں سمندر غلاموں کی جھولیاں بھی بھرکر
دعاٸیں دیتے ہیں مسکراکر درود ان پر سلام ان پر

یہ جن و انساں ، شجر حجر یہ زمیں یہ افلاک چاند سورج
جھکی خداٸی ہے جن کے در پر درود ان پر سلام ان پر

جسے مدینہ زمانہ بولے وہی مدینہ میں سب برابر
نہ کوٸی اعلی نہ کوٸی کمتر درود سلام ان پر

خدا نے محبوب کو بلایا یہی ہے معراج مصطفی کی
چلے ہیں جبریل ساتھ لیکر درود ان پر سلام ان پر

مرے نبی کی ہے آج آمد ربیع اول کا ہے مہینہ
محبتوں کا دیا جلاکر درود ان پر سلام پر

محبتوں کا ہے یہ تقاضہ یہی غلامی کا ہے طریقہ
پڑھو ہمیشہ ہی لو لگاکر درود ان پر سلام ان پر

کھجوروں کے جھاڑوں میں کبھی گبندوں کے ساٸے تلے مزے سے
کہ پڑھتے ہیں مل کے سب کبوتر درود ان پر سلام ان پر

چلا مدینے کا تذکرہ پھر، مچل رہی ہے مری طبیعت
نظر میں آیا حسین منظر درود ان پر سلام ان پر

کبھی کیا غور تو نے اس پر کہ ہم سے بہتر ہے کیا یہ پتھر
کہ پڑھتا ہے بے زبان پتھر درود ان پر سلام ان پر

رسول اعظم سراپا رحمت حبیب داور شفیع محشر
”وہ سب سے افضل وہ سب سے برتر درود ان پر“سلام ان پر

سجی ہے محفل سلام کی پھر محبتوں میں یہاں پہ آکر
کہ پڑھتے ہیں سارے سر جھکاکر درود ان پر سلام ان پر

فرشتے آٸیں گے جب لحد میں حساب لینے سوال لیکر
پڑھوگا محسن لحد کے اندر درود ان پر سلام ان پر
۔۔۔۔۔۔۔۔۔۔۔۔۔۔۔۔۔
منقبت

کریں چشمِ عنایت غوث اعظم
کروں اب میں بھی مدحت غوث اعظم
شہنشاہِ ولایت غوث اعظم
سراپا ہیں کرامت غوث اعظم
مرا بھی نام ہو شامل خدایا
کریں گے جب شفاعت غوث اعظم
علی کے لعل سے ہے تیرا رشتہ
نرالی تیری نسبت غوث اعظم
پلادیں شربتِ دیدار مجھ کو
مٹا دیں دل کی حسرت غوث اعظم
پڑھا ہے کلمہ ء حق ڈاکوؤں نے
صداقت کی بدولت غوث اعظم
کرو محسن میاں تم بھی تجارت
کہ کرتے تھے تجارت غوث اعظم
۔۔۔۔۔۔۔۔۔۔۔۔۔۔۔۔۔۔۔
غزلیں

بزم میں جیسے چاندنی آئی
آپ آئے تو دلکشی آئی
غم کے بادل چھٹے خوشی آئی
آپ آئے تو روشنی آئی
میں تمہیں یاد کرتا رہتا ہوں
یاد تم کو کبھی مری آئی
رشتہ داروں پہ تھا بھروسہ مگر
کام مشکل میں دوستی آئی
ہاں! سمندر کہیں نہیں جاتا
پاس چل کر کے خود ندی آئی
خاک چھانی ہے در بدر ہم نے
جا کے تب علم و آگہی آئی
میں تو شاعر نہیں تھا پہلے سے
دیکھ کر تجھ کو شاعری آئی
خُلد کا جب خیال آیا ہے
بس نظر میں تری گلی آئی
اصل ہے زندگی یہی محسن
موت کے بعد زندگی آئی
۔۔۔۔۔۔۔۔۔۔۔۔۔
کھیل کا لطف پا رہا ہوں میں
ریت کا گھر بنا رہا ہوں میں
آئیں گے وہ کبھی ، مرے دل کو
بس تسلی دلا رہا ہوں میں
مال و دولت ، زمین و گھر، اولاد
چھوڑ کر سب کو جا رہا ہوں میں
مفلسی تُو ستا رہی ہے مجھے
موت کو بس بلا رہا ہوں میں
میرے آنسو نہ دیکھ لے کوئی
بارشوں میں نہا رہا ہوں میں
پھول دے گا ضرور میرا چمن
خون اپنا پلا رہا ہوں میں
سچ کا سر ہو بلند اے محسن
اپنی گردن کٹا رہا ہوں میں
۔۔۔۔۔۔۔۔۔۔۔۔
دلنشیں کردار ہونا چاہئے
ہم کو خوش گفتار ہونا چاہئے
دل تمہارے پاس ہے گر دوستو
پھر کوئی دلدار ہونا چاہئے
چاہتے ہو بارشِ عشق و وفا
بادلوں سا یار ہونا چاہئے
کر لو تم اتنی ترقی ہے دعا
چاند پر گھر بار ہونا چاہئے
پیڑ ویسے ہیں بہت ہر اک جگہ
دوستو ! پھل دار ہونا چاہئے
لوگ مسلم دیکھ کر خود سے کہیں
ایسا ہی کردار ہونا چاہئے
مذہبِ اسلام نے تعلیم دی
سب کو خوش گفتار ہونا چاہئے
آپ شاعر ہیں تو گھر میں آپ کے
اردو کا اخبار ہونا چاہئے
نوکری سے لاکھ بہتر ہے میاں
اپنا کاروبار ہونا چاہئے
سو کے کھویا ہے بہت کچھ قوم نے
قوم کو بیدار ہونا چاہئے
میں وطن سے دور ہوں محسن میاں
شہر میں گھر بار ہونا چاہئے
۔۔۔۔۔۔۔۔۔۔۔۔
گیت محفل میں گا رہا ہوں میں
آؤ آؤ بلا رہا ہوں میں
اب بجھا دو چراغ سارے تم
اپنے دل کو جلا رہا ہوں میں
میری غزلیں ہیں آئینہ لوگو
ہو بہو کچھ دکھا رہا ہوں میں
سلسلہ رنج و غم کا ہے لیکن
ہر گھڑی مسکرا رہا ہوں میں
راس آیا نہ کوچہ ء محبوب
دردِ غم لے کے جا رہا ہوں میں
بےوفا مجھ کو مت کبھی کہنا
نام اپنا مٹا رہا ہوں میں
عشق میں جو بھی مجھ پہ گزری ہے
آج محسن سنا رہا ہوں میں
۔۔۔۔۔۔۔۔۔۔۔۔
تم کو پتا ہے یار میں بندہ غریب ہوں
کچھ مانگتا نہیں ہوں میں ایسا غریب ہوں

دل کیا ہے پیار میں تو لٹادوں میں جان بھی
دل کا بڑا ہوں، پیسے سے مانا غریب ہوں

پہچان بس یہی ہے جہاں میں غریب کی
دیتا نہیں کسی کو بھی دھوکہ، غریب ہوں

پروردگار نے ہی بنایا غریب ہے
لاتا نہیں زبان پہ شکوہ غریب ہوں

ان سے تھا پیار مجھ کو مگر تھا امیر وہ
اظہار کردیا نہیں سوچا غریب ہوں

سیرت سے پیار ہے مجھے یہ بات یاد رکھ
آٸندہ پھر کبھی تو نہ کہنا غریب ہوں

میں آج تک ہوں ان کے جوابوں کا منتظر
اک خط میں لکھ دیا انہیں پکا غریب ہوں

محفل میں سب نے مل کے بنایا مرا مذاق
کپڑا پرانا دیکھ کے سمجھا غریب ہوں

شعر و سخن کا مال کماٸی ہے عمر کی
محسن بتاٶ یار میں کیسا غریب ہوں
۔۔۔۔۔۔۔۔۔۔۔۔۔۔

قطعات
ملی نہ مجھ کو وہ میرا نصیب ہوتے ہوئے
بہت ہی دور ہے میرے قریب ہوتے ہوئے
یہ ایسی بھول ہے جس کی کوئی تلافی نہیں
کہ میں نے پیار کیا ہے غریب ہوتے ہوئے
۔۔۔۔۔۔
خلوص پیار ہر اک سو بکھیر دیتے ہیں
جہاں بھی جاتے ہیں خوشبو بکھیر دیتے ہیں
نشہ سا چھاتا ہے محسن نواز محفل پر
یہ اردو والے تو جادو بکھیر دیتے ہیں