تسطیر بر شعر راحت اندوری

(1)
میں جب مر جاؤں تو میری الگ پہچان لکھ دینا
لہو سے میری پیشانی پہ ہندوستان لکھ دینا
(راحت اندوری)

تسطیر
(نذرِ راحت اندوری)
میں جب مر جاؤں تو میری الگ پہچان لکھ دینا
بِنا پہچان کا شہری ہوں یہ عنوان لکھ دینا
میں غلطی سے مسلماں ہوں اسی مٹّی کا پُتلا ہوں
یہیں اجداد مٹّی میں ملے، یہ شان لکھ دینا
لہو میں دوڑتا پھرتا رہا میرے، وطن ہر دم
لہو سے میری پیشانی پہ ہندوستان لکھ دینا
تسطیر نتیجۂ فکر : مسعود بیگ تشنہ
12 اگست 2020 ،اِندور ،انڈیا
***
(2) تسطير بر شعر راحت اندوری :
یہ سانحہ تو کسی دن گزرنے والا تھا
میں بچ بھی جاتا تو اک روز مرنے والا تھا
(راحت اندوری)

تسطیر
یہ سانحہ تو کسی دن گزرنے والا تھا
میں مُشتِ خاک سا اک دن بکھرنے والا تھا
میں جی لیا تھا مگر اہلِ خانہ کیا کرتے
مزاج پُرسی کہاں کوئی کرنے والا تھا
چلو کہ مرنے دیا اپنے ہی وطن میں مجھے
میں بچ بھی جاتا تو اک روز مرنے والا تھا
تسطیر نتیجۂ فکر : مسعود بیگ تشنہ
12 اگست 2020 ،اِندور ،انڈیا
***
(3) تسطير بر شعر راحت اندوری :
نئے سفر کا جو اعلان بھی نہیں ہوتا
تو زندہ رہنے کا ارمان بھی نہیں ہوتا
(راحت اندوری)

تسطیر
نئے سفر کا جو اعلان بھی نہیں ہوتا
مطب کو جانے کا فرمان بھی نہیں ہوتا
نہ سینہ دھونکنی بنتا، کلیجہ چھلنی ہی
فرشتہ موت کا دربان بھی نہیں ہوتا
جو اہلِ خانہ کا نہ کچھ وطن کا ہوتا قرض
تو زندہ رہنے کا ارمان بھی نہیں ہوتا
تسطیر نتیجۂ فکر : مسعود بیگ تشنہ
12 اگست 2020 ،اِندور ،انڈیا
***
مسعود بیگ تشنہ کی یہ تسطیر بھی ملاحظہ فرمائیں :تسطیر بر شعر مخمور سعیدی